ეს უნდა ნახო აჭარაში

დღე 1 | კეთილი იყოს თქვენი მობრძანება ბათუმში

ბათუმის ან ქუთაისის საერთაშორისო აეროპორტში ჩამოსვლისთანავე დაგხვდებათ ჩვენი წარმომადგენელი, რომელიც სასტუმრომდე კომფორტულ ტრანსფერს უზრუნველყოფს. განთავსებისა და მცირე დასვენების შემდეგ, გაეცნობით ბათუმს შავი ზღვის სანაპიროზე გაშენებულ ქალაქს, სადაც ევროპული არქიტექტურა, თანამედროვე ურბანული სივრცეები და სუბტროპიკული ბუნება განსაკუთრებულ ჰარმონიას ქმნის. გასეირნებას დავიწყებთ პიაცას მოედნიდან იტალიური არქიტექტურით შთაგონებული ერთ-ერთი ყველაზე გამორჩეული სივრციდან ბათუმში. შემდეგ მოვინახულებთ წმინდა ნიკოლოზის ეკლესიას, ქალაქის ერთ-ერთ უძველეს მართლმადიდებლურ ტაძარს, რომლის ისტორია XIX საუკუნეს უკავშირდება. მოგზაურობას ევროპის მოედანზე გავაგრძელებთ, სადაც მედეას მონუმენტი ოქროს საწმისით კოლხეთის სამეფოსა და არგონავტების ლეგენდარულ მითს აცოცხლებს. აქვე შეგიძლიათ იხილოთ ევროპის მოედნის არქიტექტურული ანსამბლი, ასტრონომიული საათი და ნეპტუნის შადრევანი, რომლებიც ბათუმის ევროპულ იერს განსაკუთრებულ ხიბლს სძენს. შემდეგ გავისეირნებთ ბათუმის ცნობილ ბულვარში, მოვინახულებთ სასწაულების პარკს, ქართული ანბანის უნიკალურობას მიძღვნილ ანბანის კოშკს და სიყვარულის სიმბოლოდ ქცეულ მოძრავ ქანდაკებას „ალი და ნინო“, რომელიც სხვადასხვა კულტურის ადამიანებს შორის სიყვარულისა და ერთიანობის იდეას გამოხატავს. დღე დასრულდება იახტით გასეირნებით შავ ზღვაზე. ზღვის მხრიდან გადაშლილი განათებული ბათუმის პანორამა თქვენი მოგზაურობის პირველი დაუვიწყარი შთაბეჭდილება იქნება. კვება: – / – / – ღამისთევა ბათუმში

დღე 2 | უძველესი ისტორია და შავი ზღვის სანაპიროს ბუნება

დღევანდელი დღე აჭარის ორ უმნიშვნელოვანეს ისტორიულ და ბუნებრივ ღირსშესანიშნაობას ეთმობა. პირველად მოვინახულებთ პეტრას ციხესიმაგრეს VI საუკუნის ბიზანტიურ ციხეს, რომელიც შავი ზღვის სანაპიროს მაღლიდან გადმოჰყურებს. სტრატეგიული მდებარეობის წყალობით, იგი საუკუნეების განმავლობაში ევროპასა და აზიას შორის მნიშვნელოვან სავაჭრო და სამხედრო ცენტრს წარმოადგენდა. შემდეგ ვეწვევით ბათუმის ბოტანიკურ ბაღს აღმოსავლეთ ევროპის ერთ-ერთ ყველაზე მრავალფეროვან ბოტანიკურ ბაღს. სასიამოვნო საფეხმავლო ბილიკები, ეგზოტიკური მცენარეები, სუბტროპიკული ტყეები და ზღვის პანორამული ხედები აქ განსაკუთრებულ ატმოსფეროს ქმნის. დღის ბოლოს ბათუმის თევზის ბაზარში ადგილობრივ მეთევზეებს შეხვდებით, თავად შეარჩევთ ახალდაჭერილ თევზსა თუ ზღვის პროდუქტებს და მათ ახლომდებარე საოჯახო რესტორანში დააგემოვნებთ ეს ბათუმის ზღვისპირა ცხოვრების ერთ-ერთი ყველაზე ავთენტური გამოცდილებაა. ღამისთევა ბათუმში კვება: საუზმე

დღე 3 | მაჭახელას საგანძური

დღეს ბათუმის სანაპიროს დავტოვებთ და მთიანი აჭარისკენ გავემართებით რეგიონში, სადაც ბუნება, ტრადიციები და სოფლის ცხოვრება დღემდე ავთენტურ სახეს ინარჩუნებს. პირველი გაჩერება ბორჯღალოს ეთნოგრაფიული მუზეუმია, სადაც ხეზე ხელით ნაკვეთი ფიგურები აჭარის ტრადიციულ ყოფას, საქმიანობასა და ყოველდღიურ ცხოვრებას აცოცხლებს. შემდეგ მოვინახულებთ მირვეთის ჩანჩქერს, რომელიც სუბტროპიკული ტყის წიაღშია მოქცეული. ხის ხიდზე გადასვლისა და უძველესი ხეების ჩრდილში გასეირნების შემდეგ აღმოაჩენთ აჭარის ერთ-ერთ ყველაზე მშვიდ და თვალწარმტაც ბუნებრივ კუთხეს. მოგზაურობა გაგრძელდება მაჭახელას ხეობაში რეგიონში, რომელიც გამორჩეულია ხელუხლებელი ბუნებით, ტრადიციული სოფლებითა და მრავალსაუკუნოვანი ხელოსნური კულტურით. მაჭახელა საუკუნეების განმავლობაში ცნობილი იყო თავისი თოფის ოსტატებით, რომელთა მიერ დამზადებული მაჭახელას თოფები მთელ კავკასიაში განსაკუთრებული ხარისხითა და დამზადების ტექნოლოგიით გამოირჩეოდა. შემდეგ ავალთ გვარას ციხეზე, საიდანაც მთიანი აჭარის ულამაზესი პანორამები იშლება. დღის განსაკუთრებული ნაწილი ტრადიციული აჭარული სადილია ადგილობრივ ოჯახში, სადაც რეგიონულ კერძებთან ერთად ახლოდან გაეცნობით ქართულ სტუმართმოყვარეობას. მსურველებისთვის შესაძლებელია დამატებით ზიპლაინით ან კვადროციკლით გასეირნება. ღამისთევა ბათუმში კვება: საუზმე / სადილი

დღე 4 | ღვინო, ჩანჩქერები და აჭარული მარიფათ

დღევანდელი დღე აერთიანებს ისტორიას, ბუნებასა და ქართული კულტურის ერთ-ერთ ყველაზე მნიშვნელოვან სიმბოლოს ღვინოს. მოგზაურობას დავიწყებთ გონიოს ციხესიმაგრით შავი ზღვის აღმოსავლეთ სანაპიროს ერთ-ერთი უძველესი რომაული ციხესიმაგრით, რომლის ისტორია ორ ათასწლეულზე მეტს ითვლის. შემდეგ მთიანი აჭარის ულამაზესი გზებით გავემართებით მახუნცეთის ჩანჩქერისკენ და მოვინახულებთ შუა საუკუნეების არქიტექტურის გამორჩეულ ნიმუშს თამარ მეფის თაღოვან ხიდს, რომელიც საუკუნეების განმავლობაში აკავშირებდა ადგილობრივ მოსახლეობას. დღე დასრულდება ოჯახურ მარანში, სადაც გაეცნობით ქართული მეღვინეობის მრავალსაუკუნოვან ტრადიციას. საქართველო ღვინის სამშობლოდ მიიჩნევა, ხოლო ქვევრის ღვინის დაყენების მეთოდი იუნესკოს არამატერიალური კულტურული მემკვიდრეობის ნუსხაშია შეტანილი. ადგილობრივი ღვინის დაგემოვნება, ტრადიციული აჭარული კერძები და მასპინძლების გულთბილი მიღება ამ დღეს განსაკუთრებულად დასამახსოვრებელს გახდის. ღამისთევა ბათუმში კვება: საუზმე / სადილი

დღე 5 | თავისუფალი დღე ბათუმში

დღეს შეგიძლიათ ბათუმი საკუთარი სურვილისამებრ აღმოაჩინოთ. დაისვენეთ ზღვის სანაპიროზე, გაისეირნეთ ბულვარში, მოინახულეთ მუზეუმები, კაფეები, მაღაზიები ან სურვილის შემთხვევაში შეარჩიეთ დამატებითი ექსკურსია შვენთან ერთად. ღამისთევა ბათუმში კვება: საუზმე

დღე 6 | გამგზავრება

საუზმის შემდეგ დატოვებთ სასტუმროს და ჩვენი ტრანსპორტი ბათუმის საერთაშორისო აეროპორტში გადაგიყვანთ. მოგზაურობა დასრულდება, თუმცა აჭარის ზღვისპირა პეიზაჟები, მთების სილამაზე, უძველესი ისტორია, გამორჩეული სტუმართმოყვარეობა და ავთენტური გემოები კიდევ დიდხანს დარჩება თქვენს მოგონებებში. კვება: საუზმე